Монгол Улсын Ерөнхийлөгч У.Хүрэлсүхийн санаачилсан “Хүнсний хангамж, Аюулгүй байдал” үндэсний хөдөлгөөний дагуу УИХ-аас 36-р тогтоолыг баталсан билээ. 36-р тогтоол нь нийт 5 бүлэг, 49 заалт, 116 арга хэмжээнээс бүрдэх бөгөөд ирэх 5 жилд хүнсний гол нэрийн 19 төрлийн бүтээгдэхүүнийг дотооддоо үйлдвэрлэх, улмаар хүнс экспортлогч улс болох зорилгын хүрээнд хэрэгжих юм. Өөрөөр хэлбэл эх орондоо хүнсний хувьсгал хийж буй түүхэн мөч ажил амжилттай хэрэгжиж эхэллээ. Үндэсний хөдөлгөөний үйл ажиллагааг хариуцсан Хүнсний төсөл, хөтөлбөр хариуцсан албаны даргаар Доктор /PhD/, профессор Ч.Даваабаяр томилогдон ажиллаж байна.
Хүнсний хувьсгал үндэсний хөдөлгөөний хүрээнд хүнсний хангамж, аюулгүй байдлыг хангах, цаашид экспортын чиг баримжаатай хүнс, хөдөө аж ахуйн бүтээгдэхүүний үйлдвэрлэлийг хөгжүүлэхэд шаардлагатай нийт 1.7 их наяд төгрөгийн санхүүжилтийн эх үүсвэрийг 2022-2026 онд улсын төсвөөс зээлийн хүүгийн татаас болон батлан даалт, гадаадын зээл, тусламжийн хөрөнгөөр санхүүжүүлэхээр тусгасан бөгөөд энэ хүрээнд 834 тэрбум ₮ ийн ногоон зээл санхүүжилт олгогдоод байна.
Хүнсний хувьсгал үндэсний хөдөлгөөний хүрээнд зөвхөн зээлийн хүүгийн татаасанд 100 тэрбум ₮ ийн дэмжлэг олгоход үүнийг дагаад санхүүгийн зах зээлд 1 их наяд төгрөгийн чөлөөт эх үүсвэр бий болох боломжтой болох юм.
Нэгэн жишээгээр Дотоодын тахианы махны импортын хэрэглээг бүрэн халахад шаардлагатай хөрөнгө оруулалт, санхүүжилт нь 20 сая ам доллар байх бөгөөд уг санхүүжилтийн жилийн арилжааны банкны хүүний зардал нь 10 тэрбум ₮ байна гэж үзвэл Хүнсний хувьсгал үндэсний хөдөлгөөн хөтөлбөрт тусгасан жил бүр 100 тэрбум ₮ ийн хүүгийн татаас олгох нь ямар чухал ач холбогдолтой болохыг илтгэж байна.
Тахиа махны импорт 2030 онд 370 тэрбум ₮ хүрнэ.
2018 онд 11 мянган тонн тахиа махыг 21 сая ам доллараар импортоор авч байсан бол 2024 онд 51 сая ам доллараар 30 мянган тонн мах импортоо авсан байна. Импортын хэрэглээ 2030 онд 100 сая ам долларт хүрэх төлөвтэй байна.
